Triniaeth ar gyfer gorbwysau a gordewdra
Darperir y gwasanaeth newydd hwn yn ein clinig gan Dr Carmen Munteanu, FRCA, FRCGP, Diploma mewn Rheoli Gorbwysau a Gordewdra.
Mae Dr Munteanu yn feddyg lleol profiadol sy'n arbenigo mewn rheoli gordewdra gan ddarparu ymgynghoriadau a thriniaethau wedi'u teilwra. Mae hi'n cynnig gofal sympathetig heb feirniadu ac sy’n sensitif i'ch pryderon iechyd. Mae Dr Munteanu yn cynnig dadansoddiad cyflawn o beth sy’n achosi gorbwysau, yn ogystal ag asesiad risg unigol, gan ddefnyddio dull gwyddonol.
Caiff gordewdra ei ddiffinio fel BMI (Mynegai Màs y Corff) dros 30 kg/m2.
Fodd bynnag, mae’r ymchwil feddygol wedi dangos bod gordewdra yn llawer mwy cymhleth na chyfrifo'r BMI. Mae dosbarthiad y mathau gwahanol o fraster yn y corff, oedran ac ethnigrwydd yn benderfynyddion pwysig o'r iechyd a'r risgiau iechyd cyffredinol.
Er bod y prif reswm y mae pobl yn gofyn am gymorth gyda lleihau pwysau yn esthetig, mae gordewdra yn gysylltiedig â chynnydd sylweddol mewn risgiau o ran syndrom metabolaidd, diabetes, clefyd isgemia’r galon, apnoea cwsg, anffrwythlondeb (i nodi ychydig o gymhlethdodau yn unig). Mae'r ymateb llidus parhaus yn y corff wedi'i gysylltu â chynnydd mewn risgiau canser, dementia ac wrth gwrs, heneiddio.
Mae Dr Munteanu yn mynd i’r afael â rheoli gordewdra meddygol yn debyg i sut y mae'n ymdrin â chlefydau cronig eraill. Felly mae colli pwysau a chynnal y pwysau hwn yn dasg heriol a hirdymor ac nid yw'n wahanol i drin clefyd cronig arall fel diabetes, clefyd cronig yr ysgyfaint, pwysedd gwaed uchel.
Byddwch yn mynd ati gyda’ch gilydd i gytuno ar addasiadau ffordd o fyw personol. Lle nodir, ochr yn ochr â'r addasiadau deietegol, corfforol a seicolegol, mae Dr Munteanu yn rhoi presgripsiwn am feddyginiaeth colli pwysau cymeradwy a chydnabyddedig.
Mae bellach yn bosib cael mynediad at feddyginiaeth o'r fath dros y rhyngrwyd heb asesiad meddygol priodol nac unrhyw gamau dilynol, ond gall hyn beri risgiau sylweddol i'ch iechyd. Os oes angen meddyginiaeth o'r fath arnoch, bydd hi'n darparu'r feddyginiaeth iawn yn y dos cywir.
Rydym yn darparu asesiad meddygol a chamau dilynol cynhwysfawr, i sicrhau bod y feddyginiaeth yn effeithiol. Byddwch yn cael eich tywys a’ch cynghori ar y ffyrdd o drechu ac ymdrin â sgil-effeithiau mwyaf cyffredin y feddyginiaeth.
Mae ein clinig wedi ymrwymo i'ch diogelwch meddygol ar y daith hon, a byddwn yn monitro eich iechyd yn unol â hynny. Rydym yn mesur llwyddiant nid yn unig trwy’r "pwysau a gollir" ond hefyd trwy welliannau yn eich canlyniadau labordy, arwyddion hanfodol, cyfansoddiad y corff, sefydlogi clefydau cronig cysylltiedig eraill ac ansawdd bywyd.
Mae llwyddiant yn dibynnu ar lawer o ffactorau, gan gynnwys geneteg, cyflyrau iechyd cysylltiedig, defnydd o feddyginiaeth, a'ch nodau personol ar gyfer triniaeth hirdymor.
Yn ystod eich taith, byddwn yn dathlu eich llwyddiannau ac yn eich cefnogi trwy adegau anodd. Peidiwch ag oedi i holi cwestiynau a rhannu unrhyw drafferthion rydych chi’n eu hwynebu.
Mae'r ymgynghoriad cyntaf yn para tua 90 munud ac yn cynnwys hanes meddygol manwl, archwiliad, gan ddilyn gyda chytundeb ar y cynllun rheoli. Bydd y cynllun dilynol yn cael ei gytuno ar y pwynt hwn.
Mae Dr Munteanu yn feddyg ymgynghorol lleol profiadol. Cwblhaodd ei hyfforddiant meddygol ym Mhrifysgol Grigore T Popa yn Iasi, Rwmania. Symudodd i Gymru ym 1993 yn syth ar ôl gorffen yr ysgol feddygol. Cwblhaodd ei hyfforddiant fel anesthetydd a llwyddodd i basio'r arholiad FRCA ym 1996.
Yn 2002 cwblhaodd ei hail hyfforddiant arbenigol mewn 'Ymarfer Cyffredinol', gyda Chymrodoriaeth Glinigol am flwyddyn i ddilyn, gan ennill mwy o brofiad mewn meddygaeth cyhyrysgerbydol a phigiadau cymalau ym Mhrifysgol Caerfaddon. Mae hi'n Gymrawd y Coleg Brenhinol Ymarfer Cyffredinol yn Llundain ac yn ddiweddar cwblhaodd Ddiploma ôl-raddedig mewn Gordewdra a Rheoli Pwysau ym Mhrifysgol De Cymru.
Rheoli gorbwysau a gordewdra yn feddygol yw ei diddordeb meddygol arbennig.
Darllenwch adolygiadau ac adborth cleifion Dr Carmen Munteanu